काठमाडौं । इस्तानबुलमा विगत एक दशककै सबभन्दा भयानक सुक्खा परेपछि ४५ दिनमा पानी सबै सकिने देखिएको छ । 

बढ्दो शहरीकरणका कारण बनाइएका बाँधहरूले गर्दा सुक्खाको स्थिति आएको र १ करोड ७० लाख मानिस बस्ने शहरको जलस्रोत सुकेको बताइएको छ । 

शहरको प्रमुख जलस्रोतका रूपमा रहेको ओमर्ली बाँधको जलस्तर विगत १५ वर्षमा सबभन्दा तल छ । पानी नपरेकाले गर्दा उक्त बाँधमा २० प्रतिशत मात्र पानी छ । 

राजधानी अंकाराका मेयर मन्सुर याभासले बाँध र जलभण्डारमा ११० दिनलाई पुग्ने पानी मात्र रहेको बताएका छन् । 

टर्कीका अन्य दुई ठूला शहर इजमिर र बुर्साका बाँधको पानी पनि क्रमशः ३६ र २४ प्रतिशतमा झरेको छ । 

परिस्थिति भयानक बनेपछि मस्जिदहरूलाई पानी परोस् भनी प्रार्थना गर्न अनुरोध गरिएको छ । 

तर देशका जलभण्डारमा पानीको मात्रा लगातार घट्दै गएको छ । नोभेम्बर महिनामा वर्षा ४९ प्रतिशतले घटेको थियो र त्यपछि औसतभन्दा कम पानी परेको छ ।

टर्कीले प्रतिवर्ष प्रतिव्यक्ति १३ सय ४६ क्युबिक मिटर पानी मात्र उत्पादन गर्छ । यसले गर्दा यो पानी कम भएको (वाटर स्ट्रेस्ड) मुलुकमा पर्छ । 

एजेन्सी