एजेन्सी । स्पेनिस ला लिगाको शीर्षस्थानमा रहेको एट्लेटिको म्याड्रिड र लेभान्टे गएराती भएको खेलमा १–१ बराबरीमा रोकिएका छन् ।

लेभान्टेको मैदानमा भएको खेलमा एट्लेटिकोले एक गोलले पछि परेको अवस्थामा बराबरी गर्न सफल भएको हो । घरेलु टोली लेभान्टेका इनिस बार्धीले गोल गर्दा एट्लेटिकोका मार्कोस लोरेन्टेले बराबरी गोल फर्काए ।

खेलको १७औं मिनेटमा इनिस बार्धीको गोलबाट लेभान्टले अग्रता लिएको थियो । ३७औं मिनेटमा मार्कोस लोरेन्टेले कोकीको पासमा गोल गर्दै खेललाई १–१ गोलको बराबरीमा ल्याए । त्यसपछि थप गोल निस्कन नसक्दा खेल बराबरीमा टुंगियो ।

यो बराबरीसँगै शीर्षस्थानमा रहेको एट्लेटिकोको २२ खेलबाट ५५ अंक पुगेको छ ।